Во продолжение на работната посета на Германија, министерот за надворешни работи, Бујар Османи,оствари средба со Михаел Рот, државен министер за Европа во германското МНР. Османи ја потенцираше важноста од имплементација на одлуката на советот на ЕУ од март минатата година,како важен услов за задржување на европскиот кредибилитет во регионот, особено кредибилитетот на процесот на проширување. Во оваа насока Османи нагласи: „Охрабрува фактот што во рамките на претседавачкото трио, Германија ја задржува својата проактивна улога во поддршка на португалското претседателство, за закружување на процесот на обединување на Европа, како заеднички европски интерес. Велам заокружување затоа што Северна Македонија, па и воопшто регионот на Западниот Балкан не се наоѓа на периферијата од Европа, туку во срцето на Европа, опкружени единствено, и само со земји – членки на ЕУ. Ваквиот чекор ќе упати неопходно охрабрување до целиот регион и ќе го зацврсти европскиот кредибилитет во целост“. На средбата со Уве Корсепиус, советник за ЕУ на канцеларката Меркел, фокусот повторно беше ставен на реафирмација на германската поддршка за нашите европски перспективи, но беа отворени прашања и за други форми на соработка со цел развој на севкупните односи меѓу двете земји. Агендата на Османи во Берлин содржеше средби со повеќе значајни соговорници и во таа насока министерот се сретна со Забине Штер, ополномоштеник за ЕУ политики и Сузане Шуц, директорка за Југоисточна Европа, Турција и државите на ЕФТА, во МНР на Германија. Посетата на Германија беше искористена и за средби во Бундестагот каде што Османи се сретна со Гинтер Крихбаум, претседател на Комитетот за европски прашања и со Мануел Сарацин, на кои беше разговарано за билатералната соработка меѓу двете земји, при што беше укажано дека реализацијата на реформите во Република Северна Македонија се, пред сѐ, за бенефит на самите граѓани и трансформација на земјата во кредибилна европска демократија. Заеднички беше потврдено дека Северна Македонија испорача и дека нашата држава заслужува да го почне процесот на преговори и трансформација со цел членство во ЕУ. Работната посета на Берлин на шефот на дипломатијата Османи е дел од неговата дипломатска турнеја низ земјите членки на Европската унија. Реафирмираната поддршка од страна на Германија е позитивниот исход од оваа посета и значаен поттик за државата во оваа насока. Веќе утре Османи патува за Копенхаген на средба со неговиот хомолог, министерот Јепе Кофод.  

Берлин, 3 мај 2021

Министерот за надворешни работи,Бујар Османи, работната посета на Сојузна Република Германија утрово ја започна со средба со министерот за надворешни работи на Германија, Хајко Мас. На средбата беа отворени темите поврзани со европските интеграции на Република Северна Македонија, како и последните актуелности од регионален аспект. Главниот фокус на средбата беше ставен на заокружување на нашата стратешка цел, членство во Европската унија, а во тој контекст беше дискутирано и за амбициите на регионалните иницијативи како што е Берлинскиот процес. Османи го информираше Мас и за реформите за јакнење на правната држава и борбата против корупцијата, при што беше посочено дека оваа битка ќе остане непристрасна и неселективна и ќе биде направено сѐ да се задржат и оваа година високите оценки кои континуирано, Северна Македонија ги добива од Европската комисија.       Дискутирајќи за можностите за имплементација на одлуката за почеток на преговорите, Османи нагласи: “Јунските самити на ЕУ нудат неповторлива шанса да го направиме вистинскиот чекор: операционализација на одлуката за почеток на преговорите, преку усвојување на преговарачката рамки и одржување на Првата Меѓувладина конференција како  формален почеток на преговорите. Ваквиот чекор ќе упати неопходно охрабрување до целиот регион и ќе го зацврсти кредибилитетот на евро-интеграцискиот процес“. Во оваа прилика, Османи изрази благодарност за континуираниот ангажман на Германија, особено за личниот ангажман на министерот Мас, за досегашниот успех на европскиот пат на Република Северна Македонија. На средбата, соговорниците разговараа и за севкупниот развој на билатералните односи, економската соработка, состојбите поврзани со КОВИД-19 пандемијата, актуелни прашања од доменот на меѓународната политика, како и соработката во бројните мултилатерални организации. Во таа насока, Османи иницираше создавање на стратешко партнерство меѓу Сојузна Република Германија и Република Северна Македонија, што би било особено важно за забрзување и продлабочување не само на европските интегративни процеси, туку и на економската соработка меѓу двете земји. Во контекст на можностите што произлегуваат од ваквиот тип на партнерство, Османи потенцираше: “Потврда за успешноста на билатералната соработка е фактот што Германија е трговски партнер број еден за нашата земја. Над 200 компании од Германија се партнери на нашите компании, каде работат преку 20 илјади наши граѓани. Често повторувам затоа што лично сметам дека бизнисот треба да ги предводи дипломатските односи меѓу земјите и затоа посакувам многу повеќе германски бизнис кај нас“. Посетата на министерот Османи на Берлин продолжува со средбата со државниот министер надлежен за Европа Михаел Рот. Во рамките на оваа посета, Османи ќе се сретне и со Уве Корсепиус, советник за ЕУ на Канцеларката Меркел, како и со повеќе претставници на политичките групации и Комисиите во рамките на посетата на германскиот Бундестаг.  

Берлин, 3 мај 2021

Министерот за надворешни работи Бујар Османи денес во рамки на исполнување на предвидените активности кои произлегуваат од мандатна мисија, во насока на ревитализација и зајакнување на економската дипломатија, ги престави првите четири избрани економски советници, кои ќе бидат упатени во рамките на нашите амбасади за да ги предводат и имплементираат економските политики секоја земја и регион посебно. Во првиот дел од пилот проектот, Амбасадорот Илија Псалтиров, кој е Доктор по економски науки, ќе биде упатен во Варшава, од каде покрај Полска, ќе ги покрива и останатите земји од групата Вишеград, како што се Чешка, Словачка и Унгарија. Абдилџемил Саити, ќе оди во Германија, и тоа во Конзулатот во Минхен, од каде ќе се покриваат економските активности и за Австрија – две земји кои се најголемите економски партнери на земјава. Сузана Тунева, Магистер по меѓународни економски односи, ќе биде испратена во амбасадата во Анкара, секако важна дестинација од економски аспект, имајќи ги предвид длабоките економски релации кои се веќе создадени со Република Турција. Бекри Ајдини, Магистер по меѓународна економија, кој уште од самиот почеток не само што е вклучен, туку и е задолжен за портфолиото ЕКСПО 2020 Дубаи; тој има веќе специфични познавања на економските односи со Обединетите Арапски Емирати и воопшто регионот на заливот, и соодветно на тоа ќе биде упатен во амбасадата во Абу Даби. „Задачата на економските советници ќе биде секако да ги престават потенцијалите на Република Северна Македонија како привлечна дестинација за странски инвестиции; да ја промовираат земјата како атрактивна туристичка дестинација; да ги промовираат нашите извозни потенцијали; но и воопшто да ја промовираат Северна Македонија како економски и политички бренд кој претставува дел од современото општество“, истакна Османи. Покрај испраќањето економски советници, во рамки на проектот за зајакнување на економската дипломатија Османи најави и Видео-конференции со нашите партнери во овие земји и региони. „Очекувам во текот на наредните месеци, во согласност со протоколите кои ги наметна Пандемијата, да отпочнеме со видео средби и презентации со нашите партнери и колеги од Полска, Чешка, Словачка, Унгарија, Турција, Австрија, Германија, Обединетите Арапски Емирати и земјите од заливот; активност за што примарно ќе бидат задолжени економските советници кои денес ви ги претставив“, нагласи Османи. Министерот посочи дека во следната фаза од овој, пилот проект, таргет се и неколку мултилатерални економски мисии. Во координација со Министерствата за Земјоделие и за Економија, во втората половина од годинава ќе бидат испратени наши претставници и во Организацијата за храна и земјоделство на Обединетите нации или ФАО, во Рим; како и претставник во канцеларијата на Светската Трговска Организација во Женева.